ورلڈ کلچر فیسٹیول: امریکی موسیقاروں کی میوزک اور پولش آرٹسٹ کی فائن آرٹس ورکشاپ

آرٹس کونسل آف پاکستان کراچی کے زیرِ اہتمام تیسرا ورلڈ کلچر فیسٹیول 2026 کامیابی کے ساتھ جاری ہے، جس کے نویں روز امریکا اور پولینڈ سے آئے عالمگیر شہرت یافتہ فنکاروں نے خصوصی ورکشاپس کا انعقاد کیا۔ امریکی موسیقار رضوان جگانی اور پیانسٹ سولٹو نے موسیقی کے طلباء اور فنکاروں کو چیمبر میوزک کی ہم آہنگی اور توازن کے گر سکھائے، جبکہ پولش آرٹسٹ نے فائن آرٹس کی ورکشاپ کے دوران رنگوں اور کاغذ کے ذریعے امن و سکون کا پیغام دینے کی تکنیک پیش کیں۔ اس موقع پر صدر آرٹس کونسل محمد احمد شاہ نے کہا کہ فنونِ لطیفہ اور موسیقی عالمی امن کے فروغ کا سب سے بہترین ذریعہ ہیں اور دنیا کو اس وقت امن کی شدید ضرورت ہے۔ ورکشاپس میں آرٹس کونسل کے طلباء اور جوان فنکاروں کی بڑی تعداد نے عملی مشقوں میں حصہ لیا۔