گوگل کی جانب سے نئی سوشل میڈیا ایپ ’یوٹیوب ٹمبا‘ متعارف کرائے جانے کا امکان

گوگل اپنی نئی خودمختار سوشل میڈیا ایپ متعارف کرانے کی تیاری کر رہا ہے، جسے ممکنہ طور پر ‘یوٹیوب ٹمبا’ (YouTube Timba) کا نام دیا جا سکتا ہے۔ ٹیکنالوجی ویب سائٹ اینڈرائیڈ اتھارٹی کے مطابق اینڈرائیڈ کے لیے یوٹیوب ایپ کے نئے کوڈز میں اس نئی ایپ کے واضح شواہد ملے ہیں۔ رپورٹ کے مطابق اس پلیٹ فارم کا نیوی گیشن لے آؤٹ اور فیچرز انسٹاگرام سے ملتے جلتے ہیں، جس میں صارفین کو ون آن ون اور گروپ چیٹس، تصاویر و ویڈیوز شیئرنگ، کمنٹس میں وائس نوٹس اور فالو ریکوئسٹ بھیجنے کی سہولیات ملیں گی۔ اگرچہ گوگل کی جانب سے اس کی باقاعدہ رونمائی سے متعلق حتمی اعلان باقی ہے، تاہم ماہرین کے مطابق کمپنی اسے الگ ایپ کے طور پر لانے کے بجائے یوٹیوب کے اندر ہی ایک نئے سیکشن کے طور پر بھی شامل کر سکتی ہے۔