خلائی دوربین کا 22 سالہ مشن اختتام پذیر، ملبہ زمین پر گرنے کا خدشہ

امریکی خلائی ادارے ناسا کی معروف خلائی دوربین ‘نیل گیہرلز سوئفٹ آبزرویٹری’ کا تقریباً 22 سالہ تاریخی مشن زمین کی فضا میں دوبارہ داخل ہونے کے بعد اختتام پذیر ہو گیا ہے۔ امریکی خلائی فورس کے اعداد و شمار کے مطابق تقریباً 3 ہزار 200 پاؤنڈ وزنی خلائی دوربین امریکی مشرقی وقت کے مطابق صبح 7 بج کر 39 منٹ پر انڈونیشیا کے اوپر فضا میں داخل ہوئی، جہاں شدید حرارت کے باعث اس کا بیشتر حصہ تباہ ہو گیا۔ سوئفٹ آبزرویٹری کو 20 نومبر 2004 کو خلا میں بھیجا گیا تھا جس کا بنیادی مقصد گاما رے برسٹس، بلیک ہولز اور دیگر کائناتی دھماکوں کا مطالعہ کرنا تھا۔ ناسا کے مطابق 2024 میں شمسی لہروں کی شدت کی وجہ سے فضا کے پھیلاؤ کے باعث دوربین کا مدار نیچے آتا چلا گیا، جبکہ رواں سال جولائی میں ‘لنک’ نامی خلائی جہاز کے ذریعے اسے بچانے کا سائنسی مشن بھی ناکام ہو گیا تھا، جس کے بعد یہ حادثاتی طور پر فضا میں تحلیل ہو گئی۔