اے آئی کے گاڈ فادر جیفری ہنٹن کا اعتراف:شاید اے آئی کے بغیر دنیا زیادہ بہتر ہوتی

آرٹی فیشل انٹیلی جنس (اے آئی) کے ‘گاڈ فادر’ اور 2024ء میں فزکس کا نوبیل انعام جیتنے والے نامور سائنسدان جیفری ہنٹن نے اعتراف کیا ہے کہ شاید دنیا اس ٹیکنالوجی کی تیاری کے بغیر ہی زیادہ بہتر اور محفوظ رہتی۔

برطانوی روزنامے کو دیے گئے ایک انٹرویو میں کینیڈا کی ٹورنٹو یونیورسٹی سے تعلق رکھنے والے پروفیسر جیفری ہنٹن نے سخت انتباہ جاری کیا کہ اے آئی ٹیکنالوجی رواں سال کے آخر یا اگلے برس بڑے پیمانے پر کسی مالیاتی یا پاور سسٹمز بلیک آؤٹ کا باعث بن سکتی ہے۔ انہوں نے خدشہ ظاہر کیا کہ ایک دہائی کے اندر انسانیت کو علم ہو جائے گا کہ وہ اس کے خطرات کو کنٹرول کرنے میں کامیاب ہوتی ہے یا نہیں، جبکہ اس کی وجہ سے امیر اور غریب کے درمیان تفاوت، ثقافتی مسائل اور بڑے پیمانے پر بے روزگاری جیسے چیلنجز معاشرے کو تقسیم کر سکتے ہیں۔

جیفری ہنٹن نے اوپن اے آئی، انتھروپک اور میٹا جیسے اے آئی ماڈلز کی جانب سے کنٹرولڈ ماحول سے باہر نکل کر ہیکنگ کے واقعات اور سائبر حملوں پر گہری تشویش کا اظہار کیا۔ 2023ء میں گوگل کی ملازمت سے استعفیٰ دینے والے سائنسدان کے مطابق اے آئی سسٹمز انسانی ذہانت سے آگے نکل رہے ہیں، اور اگرچہ یہ شعبہ طب اور دیگر صنعتوں کی افادیت بڑھا سکتا ہے، تاہم انسانیت کا خاتمہ کرنے یا کنٹرول سے باہر نکلنے کا 10 سے 20 فیصد امکان موجود ہے جس کے لیے سخت محتاط رہنے کی ضرورت ہے۔