الٹرا پراسیس غذاؤں سے امراض قلب اور ذیابیطس کا خطرہ بڑھ جاتا ہے، تحقیق

برطانیہ میں کی گئی ایک تازہ طبی تحقیق میں انکشاف ہوا ہے کہ الٹرا پراسیس (Ultra-Processed) غذاؤں کا ضرورت سے زیادہ استعمال انسان کو امراضِ قلب اور ذیابیطس ٹائپ-2 کا شکار بنا سکتا ہے۔

یونیورسٹی کالج لندن اور امپیریل کالج لندن کی اس مشترکہ تحقیق میں 6 ہزار سے زائد افراد کی غذائی عادات اور 20 برس پر محیط ان کی صحت کا تفصیلی جائزہ لیا گیا۔ سائنسدانوں نے مشین لرننگ ٹیکنالوجی اور خون میں موجود 233 میٹابولائٹس (ننھے مالیکیولز) کی مدد سے دریافت کیا کہ الٹرا پراسیس غذائیں، جیسے کہ فاسٹ فوڈ، سوڈا، میٹھے مشروبات، کیک، اور انسٹنٹ نوڈلز، خون میں کیمیائی تبدیلیاں لاتی ہیں۔ ان غذاؤں کے استعمال سے خون میں نقصان دہ چکنائی بڑھ جاتی ہے جبکہ اومیگا 3 فیٹی ایسڈز جیسی مفید چربی کی سطح گر جاتی ہے۔

تحقیق کے نتائج سے معلوم ہوا کہ الٹرا پراسیس غذاؤں کا باقاعدگی سے استعمال امراضِ قلب کا خطرہ 17 فیصد تک بڑھا دیتا ہے، جبکہ اس کے برعکس کم سے کم پراسیس شدہ اور قدرتی غذاؤں کا استعمال امراضِ قلب کا خطرہ 17 فیصد اور ذیابیطس ٹائپ-2 کا خطرہ 40 فیصد تک کم کر دیتا ہے۔ محققین کے مطابق ان مضمر اثرات کی ممکنہ وجوہات میں معدے کے بیکٹیریا کی تبدیلی اور جسمانی ورم (Inflammation) شامل ہیں۔