چین میں 13ویں انٹرنیشنل آرمی کیڈٹس ویک، پاکستانی کیڈٹس نے سلور میڈل جیت لیا

چین کی آرمی انجینئرنگ یونیورسٹی نانجنگ میں منعقدہ 13ویں انٹرنیشنل آرمی کیڈٹس ویک میں پاکستانی کیڈٹس نے اپنی پیشہ ورانہ اور ٹیکنالوجی کی صلاحیتوں کا لوہا منواتے ہوئے بین الاقوامی ٹیموں میں پہلی اور مجموعی مقابلے میں دوسری پوزیشن حاصل کر کے سلور میڈل اپنے نام کر لیا ہے۔ مقابلوں میں چین سمیت 11 ممالک کی فوجی اکیڈمیوں کی 29 ٹیموں نے شرکت کی، جہاں پاکستان کے کالج آف الیکٹریکل اینڈ مکینیکل انجینئرنگ (EME) کے کیڈٹس نے “باکسر اَن مینڈ گراؤنڈ وہیکل” نامی پروجیکٹ پیش کر کے کانسیپٹ اینڈ پیپر کیٹیگری میں نمایاں کامیابی حاصل کی۔ اس عالمی مقابلے میں میانمار، آذربائیجان، سنگاپور، تھائی لینڈ، جنوبی کوریا، مصر اور ویتنام جیسے ممالک کے کیڈٹس شامل تھے، جہاں پاکستانی ٹیم نے اپنی جدید قابلیت اور عسکری مہارت کا مظاہرہ کیا۔