ازدواجی زندگی میں تشدد، زیادتی سے متعلق قانون سازی کی درخواست خارج

لاہور ہائیکورٹ کی جسٹس عبہر گل خان نے ازدواجی زندگی میں تشدد اور جنسی زیادتی سے متعلق الگ قانون سازی کی استدعا پر مشتمل درخواست خارج کرتے ہوئے اہم تحریری فیصلہ جاری کر دیا ہے۔ فیصلے میں واضح کیا گیا ہے کہ قانون سازی کرنا پارلیمنٹ اور صوبائی اسمبلیوں کا آئینی اختیار ہے اور عدالتیں خود ان کی جگہ قانون نہیں بنا سکتیں۔ عدالت عالیہ نے اپنے حکم نامے میں اہم ترین نکتہ اٹھاتے ہوئے قرار دیا کہ شادی سے کسی خاتون کے آئینی حقوق یا انسانی وقار کم نہیں ہوتا اور نہ ہی شادی کسی شریکِ حیات کو تشدد کا جواز فراہم کرتی ہے۔ فیصلے میں مزید کہا گیا کہ خواتین کے تحفظ کے لیے پنجاب سمیت تمام صوبوں میں گھریلو تشدد کے خلاف قوانین پہلے سے موجود ہیں، تاہم اگر اسمبلی چاہے تو اس حساس معاملے پر قانون سازی کا عمل آگے بڑھا سکتی ہے۔