جناح ہسپتال میں ریبیز سے متاثرہ 12 سالہ بچہ دم توڑ گیا

کراچی کے جناح پوسٹ گریجویٹ میڈیکل سینٹر (JPMC) میں ریبیز انسیفلائٹس (Rabies Encephalitis) میں مبتلا ایک اور کم عمر مریض دورانِ علاج زندگی کی بازی ہار گیا، جہاں جان بحق ہونے والا 12 سالہ بچہ بلوچستان کے ضلع جھل مگسی کا رہائشی تھا۔

ہسپتال انتظامیہ کے مطابق، 12 سالہ بچے کو یکم نومبر 2026ء کی شام شدید تشویشناک حالت میں جے پی ایم سی کے ایمرجنسی ڈیپارٹمنٹ لایا گیا تھا، جہاں اس میں تیز بخار، پانی سے خوف محسوس کرنے (Hydrophobia) اور چڑچڑے پن کی واضح علامات موجود تھیں۔ طبی حکام نے انکشاف کیا کہ بچے کو تقریباً ایک ماہ قبل کتے نے بائیں آنکھ کے قریب شدید زخمی کیا تھا۔ کتے کے کاٹنے کے بعد بچے کو ریبیز سے بچاؤ کی دو ابتدائی خوراکیں تو دی گئی تھیں، تاہم اینٹی ریبیز امیونوگلوبیولن (RIG) کی لازمی ویکسین فراہم نہیں کی گئی تھی جس کی وجہ سے وائرس دماغ تک پھیل گیا۔

ہسپتال حکام نے تصدیق کی ہے کہ طبی عملے کی تمام تر کوششوں کے باوجود بچہ 4 نومبر کی شام 5 بجے کے قریب دورانِ علاج دم توڑ گیا۔ طبی ماہرین کے مطابق کتے کے کاٹنے کے واقعات میں اگر زخم چہرے یا آنکھ کے قریب ہو تو اینٹی ریبیز امیونوگلوبیولن کا بروقت لگانا بچے کی جان بچانے کے لیے انتہائی ضروری ہوتا ہے۔