جعلی فلو ویکسین کی مارکیٹوں میں سپلائی کا انکشاف، ڈریپ کا الرٹ جاری

ڈرگ ریگولیٹری اتھارٹی آف پاکستان (ڈریپ) نے ملک کی مختلف مارکیٹوں میں انفلوئنزا اور فلو سے بچاؤ کی جعلی ویکسینز کی سپلائی کا انکشاف کرتے ہوئے ‘انفلو ویک ٹیٹرا’ (Influvac Tetra) اور ‘ویکسی گرپ ٹیٹرا’ (Vaxigrip Tetra) کے جعلی بیچز پر پروڈکٹ الرٹس جاری کر دیے ہیں۔ ڈریپ کے مطابق ملٹی نیشنل کمپنیوں ایبٹ فارما اور سنوفی کے نام سے جاری ان جعلی پروڈکٹس میں ‘ویکسی گرپ ٹیٹرا’ کا بیچ نمبر Y4B34 اور لاہور میں موجود ‘انفلو ویک ٹیٹرا’ کا بیچ نمبر P13 جعلسازی سے تیار کردہ پائے گئے ہیں۔ اتھارٹی نے خبردار کیا ہے کہ ناپائیدار معیار کی یہ جعلی ویکسینز انسانی صحت کے لیے شدید خطرناک اور جان لیوا ثابت ہو سکتی ہیں، جبکہ تمام صوبائی ڈرگ کنٹرول حکام کو مارکیٹ سے متعلقہ بیچز فوری ضبط کرنے اور شہریوں کو کسی بھی منفی اثر کی صورت میں فارماکوویجیلنس سینٹر کو مطلع کرنے کی ہدایت کی گئی ہے۔