راولپنڈی میڈیکل یونیورسٹی اور ملحقہ ہسپتالوں کے سالانہ بجٹ کی منظوری

راولپنڈی میڈیکل یونیورسٹی (RMU) کے سینڈیکیٹ اجلاس میں مالی سال کے لیے 3 کروڑ 86 لاکھ روپے کے فنڈز کی منظوری دے دی گئی ہے، جبکہ طبی درسگاہوں میں تعلیمی و انتظامی امور کو بہتر بنانے کے لیے کئی اہم فیصلے کیے گئے ہیں۔

اجلاس کے دوران راولپنڈی میڈیکل یونیورسٹی کے سلیکشن بورڈ کے لیے نئے سینڈیکیٹ ممبران کی نامزدگی، انڈر گریجویٹ اٹینڈنس پالیسی 2027 اپنانے، اور بورڈ آف ایڈوانسڈ سٹڈیز اینڈ ریسرچ کے لیے نئی نامزدگیوں کی بھی توثیق کی گئی۔

اس موقع پر صوبائی وزیر صحت خواجہ سلمان رفیق نے گفتگو کرتے ہوئے کہا کہ پنجاب کی تمام میڈیکل یونیورسٹیز کے مالی معاملات میں سو فیصد شفافیت کو ہر صورت یقینی بنایا جا رہا ہے، اور طبی درسگاہوں میں جدید ریسرچ و تحقیق کو بھی بھرپور انداز میں پروان چڑھایا جا رہا ہے۔ انہوں نے مزید کہا کہ وزیراعلیٰ پنجاب مریم نواز شریف کے ویژن کے مطابق عوام کو دہلیز پر صحت کی بہترین سہولیات کی فراہمی کے لیے کوشاں ہیں، پنجاب بھر میں نئے اسپتالوں کا جال بچھایا جا رہا ہے جبکہ صوبے کی تمام میڈیکل یونیورسٹیز میں ’انسٹی ٹیوٹ آف ایمرجنسی میڈیسن‘ کا قیام بھی لازمی طور پر یقینی بنایا جائے گا۔