سائنسدانوں نے سہارے کے بغیر چلنے والا روبوٹک ہاتھ تیار کر لیا

سوئٹزرلینڈ کے معروف ادارے ‘ای ٹی ایچ زیورخ’ (ETH Zurich) کی سافٹ روبوٹکس لیب کے محققین نے ایک ایسا انوکھا روبوٹک ہاتھ تیار کیا ہے جو کسی بازو یا جسم کے بغیر صرف اپنی انگلیوں کی مدد سے چلنے کی صلاحیت رکھتا ہے۔ محققین نے اس روبوٹک ڈیزائن کا موازنہ مشہور ٹی وی سیریز ‘دی ایڈمز فیملی’ کے متحرک ہاتھ ‘تھِنگ’ سے کیا ہے۔ لیب کے ڈاکٹریٹ سکالر امیر حسین کاظمی پور کے مطابق اس روبوٹک ہاتھ کو خودکار طریقے سے چلنے کے قابل بنانا ایک انتہائی پیچیدہ عمل تھا، کیونکہ مختلف سائز اور ساخت کی انگلیوں کے درمیان توازن برقرار رکھنا اور حرکت میں ہم آہنگی پیدا کرنا سب سے بڑا چیلنج تھا۔ ٹیم نے اس سائنسی پیش رفت کی ویڈیوز اور تحقیقی مقالے کا ابتدائی مسودہ جاری کر دیا ہے۔