اماراتی ریاست میں خودکار گاڑیوں کی آزمائش کا مرکز قائم، روبوٹیکسی ٹرائلز میں توسیع

متحدہ عرب امارات کی ریاست راس الخیمہ نے خودکار (آٹونومس) گاڑیوں کی آزمائش کے لیے ایک خصوصی مرکز قائم کرتے ہوئے روبوٹیکسی کے تجربات کا دائرہ کار ’الضعیت ساؤتھ‘ تک بڑھا دیا ہے، جسے مستقبل کے جدید اور پائیدار ٹرانسپورٹ نظام کی تیاری میں ایک اور اہم پیش رفت قرار دیا جا رہا ہے۔

راس الخیمہ ٹرانسپورٹ اتھارٹی نے جمعہ کے روز خودکار نقل و حرکت کا فریم ورک اور ’آٹونومس وہیکل سینڈ باکس‘ منصوبہ باضابطہ طور پر متعارف کروا دیا ہے۔ اس پُوقار تقریب میں متحدہ عرب امارات کی سپریم کونسل کے رکن اور راس الخیمہ کے حکمران شیخ سعود بن صقر القاسمی سمیت مختلف اہم سرکاری اداروں، معروف ٹیکنالوجی کمپنیوں اور تحقیقی اداروں کے اعلیٰ نمائندوں نے شرکت کی۔ اس منصوبے کا بنیادی مقصد ڈرائیور کے بغیر چلنے والی گاڑیوں کی جدید ٹیکنالوجی کو آزمانے اور جانچنے کے لیے ایک مربوط اور محفوظ ماحول فراہم کرنا، اور خودکار گاڑیوں اور جدید نقل و حمل کے شعبے میں کام کرنے والی بین الاقوامی سرمایہ کار کمپنیوں کو اپنی طرف راغب کرنا ہے۔

اتھارٹی کے مطابق، روبوٹیکسی کے ابتدائی تجربات رواں سال کے اوائل میں جزیرہ المرجان پر شروع کیے گئے تھے، جن کے دوران ان گاڑیوں نے کامیابی کے ساتھ 21 ہزار کلومیٹر سے زائد کا سفر طے کیا۔ اس دوران حاصل ہونے والے عملی اعداد و شمار (ڈیٹا) کی مدد سے گاڑیوں کی مجموعی کارکردگی، حقیقی اور پیچیدہ سڑکوں کے حالات میں ان کی صلاحیت اور مستقبل کی آپریشنل ضروریات کا باریک بینی سے جائزہ لیا گیا۔ اب روبوٹیکسی کے ان تجربات کو الضعیت ساؤتھ تک بڑھانے کا اصل مقصد مختلف مقامات، روٹس اور زمینی حالات میں خودکار گاڑیوں کی کارکردگی کو مزید جانچنا ہے تاکہ مستقبل میں انہیں ریاست کے وسیع تر ٹرانسپورٹ نیٹ ورک کا باقاعدہ اور محفوظ حصہ بنایا جا سکے۔ واضح رہے کہ اس سے قبل جزیرہ المرجان پر خودکار ’روبوبس‘ کی آزمائش بھی کامیابی کے ساتھ کی جا چکی ہے۔