ایرانی 7 نکاتی تجویز پر آئندہ چند روز میں عملدرآمد کا امکان ہے: اسماعیل بقائی

ایرانی وزارتِ خارجہ کے ترجمان اسماعیل بقائی نے تہران میں پریس کانفرنس کرتے ہوئے کہا ہے کہ امریکہ کے ساتھ مذاکرات کی بنیاد ایران کی پیش کردہ 7 نکاتی تجویز ہے اور اب گیند امریکہ کے کورٹ میں ہے۔ انہوں نے واضح کیا کہ کسی بھی معاہدے اور آبنائے ہرمز کو دوبارہ کھولنے کے لیے امریکی بحری ناکہ بندی کا خاتمہ اور ایرانی مطالبات کی منظوری ناگزیر ہے۔ اسماعیل بقائی نے امریکہ پر پچھلے دو برسوں میں سفارتی عمل کو نقصان پہنچانے کا الزام عائد کیا اور اسرائیلی حکام کے خلاف کارروائی پر عالمی فوجداری عدالت (ICC) پر امریکی دباؤ کی شدید مذمت کی۔ ترجمان نے اسرائیل کو خطے میں عدم استحکام کی بنیادی وجہ قرار دیتے ہوئے کہا کہ غزہ اور لبنان میں جاری مظالم اور سرد موسم میں امداد کی بندش کے باوجود عالمی برادری اور یورپی ممالک بے حسی کا مظاہرہ کر رہے ہیں۔