سائنس دانوں نے پہلی بار اے آئی سے بنا وائرس انسان میں داخل کر دیا

امریکی ریاست کیلی فورنیا کے اے آئی سٹارٹ اپ ‘ریڈیکل نیومیرکس’ نے طبی تاریخ میں پہلی بار ایک انسانی مریض کو مصنوعی ذہانت کی مدد سے تیار کردہ ‘بیکٹیریوفیج’ وائرسز کا مرکب دے کر تجرباتی علاج کیا ہے۔ کمپنی کے اے آئی ماڈل ‘اومنی ون’ (OmniOne) نے وائرس کے جینیاتی حصوں کو ازسرِنو اس طرح ڈیزائن کیا کہ وہ انسانی خلیوں کو نقصان پہنچائے بغیر اینٹی بائیوٹکس سے نہ مرنے والے مخصوص بیکٹیریا کی شناخت کر کے انہیں ختم کر سکیں۔ تجربہ گاہ میں مریض کے نمونوں پر کام کرنے کے بعد یہ دوا خصوصی ایمرجنسی پروگرام کے تحت دی گئی، تاہم کمپنی نے مریض کی تشخیص، علاج کے نتائج اور انفیکشن ختم ہونے کی فی الحال باضابطہ تصدیق نہیں کی اور نہ ہی سائنسی مقالے کی توثیق ہوئی ہے۔ ماہرین نے اس سائنسی پیش رفت کو جہاں اینٹی بائیوٹک مزاحمت کے خلاف بڑی کامیابی قرار دیا ہے، وہیں اسٹینفورڈ جیسے اداروں نے اے آئی کی مدد سے نئے وائرسز ڈیزائن کرنے کے نتیجے میں ابھرنے والے حیاتیاتی تحفظ (Biosafety) کے خطرات پر سخت قواعد و ضوابط کی ضرورت پر زور دیا ہے۔