برطانیہ:17 کروڑ سال قدیم سمندری ڈائنو سارکی باقیات دریافت

برطانیہ میں سیاحوں کے ہاتھوں اتفاقیہ طور پر دریافت ہونے والی ایک دیوہیکل سمندری ڈائنوسار کی باقیات کو پہلی بار باضابطہ طور پر نمائش کے لیے پیش کر دیا گیا ہے۔

تقریباً 17 کروڑ 40 لاکھ سال قبل قدیم سمندروں میں راج کرنے والے 10 میٹر لمبے اس دیوہیکل ’اِکتھیوسار‘ (Ichthyosaur) کی فوسل شدہ ہڈیاں بالکل اتفاقیہ طور پر دریافت ہوئیں۔ یہ ایک انتہائی خوفناک قدیم سمندری شکاری تھا۔ بیلجیئم سے تعلق رکھنے والے دو سیاح، مشیل پلسارٹ اور کیرین کرسٹنز، انگلینڈ کے علاقے ڈورسیٹ میں بریڈپورٹ کے قریب ساحل پر سیر کر رہے تھے کہ اچانک ان کی نظر چٹان کے ایک ایسے حصے پر پڑی جس میں سے فوسل ہڈیوں کے ٹکڑے باہر نکلے ہوئے تھے۔

دونوں سیاحوں نے قریب جا کر جب اس کا معائنہ کیا تو انہوں نے ہڈی کا ایک ٹکڑا احتیاط سے نکال کر مزید جانچ پڑتال کے لیے ماہرین کے حوالے کر دیا۔ یہ حیرت انگیز فوسل برطانیہ میں اب تک دریافت ہونے والی اپنی نوعیت کی سب سے کم عمر باقیات قرار دی جا رہی ہیں۔ اس اہم دریافت سے یہ اشارہ ملتا ہے کہ اِکتھیوسار جیسے سمندری جاندار ایک بڑی عالمی ماحولیاتی تباہی کے تقریباً 90 لاکھ برس بعد بھی دنیا کے سمندروں میں موجود تھے، جبکہ اس سے قبل یہ خیال کیا جاتا تھا کہ اس تباہی نے ان کا مکمل خاتمہ کر دیا تھا۔

ظاہری ساخت کے لحاظ سے ڈولفن سے مشابہ یہ قدیم رینگنے والے جانور سمندر کے اندر رہتے تھے لیکن آکسیجن کے لیے پانی کی سطح پر آ کر ہوا میں سانس لیتے تھے۔ اِکتھیوسار کی چھوٹی اقسام عام طور پر چھوٹی مچھلیوں اور اسکوئڈ کا شکار کرتی تھیں، تاہم ڈورسیٹ کے ساحل بریڈپورٹ میں دریافت ہونے والا یہ دیوہیکل اِکتھیوسار اپنی جسامت کے اعتبار سے دوسرے بڑے سمندری رینگنے والے جانوروں کو اپنا نشانہ بناتا ہوگا۔