آئی سی سی ون ڈے رینکنگ: عرفات منہاس، سلمان علی آغا اور حارث رؤف کی ترقی

انٹرنیشنل کرکٹ کونسل (ICC) کی جانب سے جاری کردہ نئی ون ڈے رینکنگ میں پاکستانی بیٹر سلمان علی آغا اور فاسٹ بولر حارث رؤف کی پوزیشنز میں بہتری آئی ہے۔

آئی سی سی کی تازہ ترین ون ڈے بیٹرز کی رینکنگ کے مطابق قومی ٹیم کے اسٹار بیٹر بابر اعظم ساتویں پوزیشن پر برقرار ہیں، جبکہ سلمان علی آغا ایک درجہ ترقی کے بعد 12ویں نمبر پر آ گئے ہیں۔ اس کے برعکس محمد رضوان اور فخر زمان تین تین درجے تنزلی کے بعد بالترتیب 35ویں اور 44ویں نمبر پر چلے گئے ہیں، جبکہ صائم ایوب 8 درجے تنزلی کے ساتھ 54ویں پوزیشن پر پہنچ گئے ہیں۔

بولرز کی فہرست میں اسپنر ابرار احمد کی دوسری اور شاہین آفریدی کی آٹھویں پوزیشن برقرار ہے۔ فاسٹ بولر حارث رؤف 2 درجے بہتری کے ساتھ 21ویں، نسیم شاہ 4 درجے ترقی کے بعد 45ویں، جبکہ انگلینڈ کے خلاف شاندار آل راؤنڈ کارکردگی کا مظاہرہ کرنے والے عرفات منہاس 33 درجے کی لمبی چھلانگ لگا کر 83ویں نمبر پر آ گئے ہیں۔

آل راؤنڈرز کی رینکنگ میں سلمان علی آغا ایک درجہ تنزلی کے بعد 14ویں نمبر پر چلے گئے ہیں، جبکہ شاہین آفریدی دو درجے بہتری کے ساتھ 17ویں پوزیشن پر پہنچ گئے ہیں۔