زمینی کارروائی کی تو ایران حملہ آوروں کا قبرستان بن جائے گا: پاسداران انقلاب

ایران کے پاسدارانِ انقلاب (IRGC) نے ممکنہ فوجی کارروائی پر انتہائی سخت ردِعمل کا اظہار کرتے ہوئے خبردار کیا ہے کہ اگر دشمن نے ایران کی سرزمین پر قدم رکھنے یا زمینی کارروائی کی غلطی کی تو ایران حملہ آوروں کے لیے قبرستان بن جائے گا۔

پاسدارانِ انقلاب کے ترجمان کی جانب سے جاری شدید ردِعمل میں کہا گیا ہے کہ ایرانی مسلح افواج ملک کی دفاعی صلاحیتوں، خودمختاری اور سرزمین کے ایک ایک انچ کی حفاظت کے لیے مکمل طور پر تیار اور پرعزم ہیں۔ انہوں نے واضح کیا کہ کسی بھی قسم کی بیرونی مہم جوئی یا حملے کا جواب انتہائی ہولناک اور سخت دیا جائے گا۔

یہ دھمکی آمیز بیان ایسے وقت میں سامنے آیا ہے جب خطے میں امریکا اور ایران کے درمیان فوجی تناؤ اور کشیدگی انتہائی سنگین صورتحال اختیار کر چکی ہے، جبکہ عالمی برادری کی جانب سے کشیدگی کم کرنے کی کوششیں کی جا رہی ہیں۔