وزیراعلیٰ بلوچستان نے چھوٹے انتظامی یونٹس کا قیام ناگزیر قرار دیدیا

وزیراعلیٰ بلوچستان میر سرفراز بگٹی نے کہا ہے کہ عوام کو بہتر انتظامی سہولیات کی فراہمی اور ان کی دہلیز تک رسائی آسان بنانے کے لیے صوبے میں چھوٹے انتظامی یونٹس، نئے ڈویژنز اور اضلاع کا قیام ناگزیر ہو چکا ہے۔

ڈیرہ بگٹی میں پریس کانفرنس سے خطاب کرتے ہوئے سرفراز بگٹی نے بتایا کہ کوہ سلیمان ڈویژن کی تمام ڈویژنل پوسٹوں کی باقاعدہ منظوری دے دی گئی ہے اور وہاں افسران و عملے کی تعیناتی جلد عمل میں لائی جائے گی۔ انہوں نے کہا کہ رکھنی میں ترقیاتی کاموں کا آغاز ہو چکا ہے اور حکومت اسے ایک مثالی انتظامی ڈویژن بنانے کے لیے تمام تر وسائل بکارائے گی۔

وزیراعلیٰ بلوچستان نے امن و امان کے حوالے سے بات کرتے ہوئے سیکیورٹی فورسز کی قربانیوں کی تعریف کی۔ انہوں نے گوادر میں دہشت گردانہ حملہ ناکام بنانے پر سیکیورٹی فورسز کی بروقت کارروائی اور شاندار کارکردگی کو سراہا۔