اسحاق ڈار سمیت آر فور ممالک کے وزرائے خارجہ کی ترک صدر اردوان سے ملاقات

نائب وزیراعظم و وزیرِ خارجہ اسحاق ڈار نے آر فور (R4) اور آر فور پلس ای تھری (R4+E3) اجلاسوں کے بعد دیگر وزرائے خارجہ کے ہمراہ استنبول میں ترک صدر رجب طیب اردوان سے اہم ملاقات کی، جس میں علاقائی اور بین الاقوامی امور سمیت باہمی دلچسپی کے اہم موضوعات پر تبادلہ خیال کیا گیا۔

ترجمان کے مطابق، اسحاق ڈار نے ترک صدر کو صدرِ مملکت آصف علی زرداری، وزیراعظم شہباز شریف اور آرمی چیف کی جانب سے نیک خواہشات کا پیغام پہنچایا اور کانفرنسز کی شاندار میزبانی پر ترکیہ کا شکریہ ادا کیا۔ نائب وزیراعظم نے پاکستان اور ترکیہ کے درمیان دیرینہ اسٹریٹجک اور اقتصادی تعلقات کو مزید مضبوط بنانے کے عزم کا اعادہ کیا۔

ترک صدر رجب طیب اردوان نے تمام وزرائے خارجہ کی آمد کا خیرمقدم کیا اور علاقائی امن و استحکام کے لیے منعقدہ ان اجلاسوں اور سفارتی مشاورت کے نتائج کو سراہا۔