امارات میں پاکستانیوں کیلئے ای پاسپورٹ کا اجرا، کم از کم فیس 145 درہم مقرر

متحدہ عرب امارات (UAE) میں مقیم 20 لاکھ سے زائد پاکستانیوں کے لیے ایک بڑی سہولت فراہم کرتے ہوئے ای پاسپورٹ (e-Passport) کا باقاعدہ آغاز کر دیا گیا ہے۔ ابوظہبی میں واقع پاکستانی سفارتخانے اور دبئی میں قونصل خانے نے جمعہ 23 اکتوبر 2026ء سے پاسپورٹ کی تمام نئی درخواستوں پر ای پاسپورٹ کی پروسیسنگ شروع کر دی ہے۔

پاکستانی مشنز کی جانب سے جاری کردہ ہدایات کے مطابق پہلے سے موجود مشین ریڈ ایبل پاسپورٹ (MRP) اپنی میعاد ختم ہونے تک قابلِ استعمال رہیں گے۔ شہریوں کو ہدایت کی گئی ہے کہ پاسپورٹ کی تجدید کے لیے درخواست صرف اس وقت جمع کروائیں جب اس کی میعاد میں 6 ماہ یا اس سے کم کا عرصہ باقی رہ جائے۔ ای پاسپورٹ کی نئی شرط کے تحت درخواست گزار کے نام میں پہلا اور آخری نام (First & Last Name) ہونا لازمی قرار دیا گیا ہے۔

فیسوں کا شیڈول بھی جاری کر دیا گیا ہے جس کے تحت عام طریقہ کار میں 36 صفحات کے 5 سالہ ای پاسپورٹ کی فیس 145 درہم اور 10 سالہ پاسپورٹ کی فیس 215 درہم مقرر کی گئی ہے۔ اسی طرح 72 صفحات والے 5 سالہ پاسپورٹ کے لیے 260 درہم اور 10 سالہ مدت کے لیے 390 درہم فیس ہوگی، جبکہ ارجنٹ پاسپورٹ اور گمشدہ پاسپورٹ کے اجرائ پر اضافی چارجز لاگو ہوں گے۔