نکاح نامہ پڑھے بغیر شادی نہ کریں، ونیزہ احمد کا خواتین کو اہم مشورہ

پاکستان کی معروف سابق سپر ماڈل اور اداکارہ ونیزہ احمد نے خواتین پر زور دیا ہے کہ وہ رشتہ ازدواج میں منسلک ہونے سے قبل اپنا نکاح نامہ خود غور سے پڑھیں اور اس میں درج قانونی و مالی حقوق سے بخوبی آگاہ ہوں۔ واسع چوہدری کے شو میں گفتگو کرتے ہوئے انہوں نے اعتراف کیا کہ اعلیٰ تعلیم یافتہ ہونے کے باوجود انہوں نے خود بھی شادی کے وقت اپنا نکاح نامہ نہیں پڑھا تھا اور انہیں اس کی اہمیت کا احساس تلخ تجربات کے بعد ہوا۔ ونیزہ احمد کا کہنا تھا کہ خواتین کو اپنے حقوق سے متعلق سوالات کرنے سے ہچکچاہٹ محسوس نہیں کرنی چاہیے، کیونکہ بعض اوقات لاعلمی کا فائدہ اٹھاتے ہوئے دستاویز سے اہم شقیں نکال دی جاتی ہیں۔ انہوں نے والدین پر بھی زور دیا کہ وہ بیٹیوں کی شادی کے وقت نکاح نامے کی تمام شقوں کا بغور جائزہ لینے کو یقینی بنائیں تاکہ مستقبل میں کسی قانونی یا مالی دشواری کا سامنا نہ کرنا پڑے۔