آئندہ سال بجلی چوری والے فیڈرز کے بجائے ٹرانسفارمرز پر لوڈشیڈنگ ہوگی: اویس لغاری

وفاقی وزیر برائے توانائی اویس لغاری نے اعلان کیا ہے کہ اگلے سال جون سے بجلی چوری کے خاتمے کے لیے پورے فیڈر کے بجائے صرف متعلقہ ٹرانسفارمر پر لوڈ شیڈنگ کی جائے گی۔ ڈیرہ غازی خان میں فاروق احمد خان لغاری انٹرنیشنل ایئر پورٹ کے توسیعی منصوبے کا معائنہ کرنے کے بعد میڈیا سے گفتگو کرتے ہوئے انہوں نے بتایا کہ گزشتہ 5 سال سے غیر فعال اس ایئرپورٹ کی ساڑھے 5 ارب روپے کی لاگت سے توسیع کی جا رہی ہے جو اگلے سال کے آخر تک مکمل طور پر آپریشنل ہو جائے گا۔ اس منصوبے کے تحت رن وے کو 10 ہزار فٹ تک لمبا اور 45 میٹر چوڑا کیا جا رہا ہے تاکہ رات کے وقت بھی لینڈنگ ممکن ہو سکے۔ انتظام و انصرام اور نئے صوبوں پر بات کرتے ہوئے وفاقی وزیر نے واضح کیا کہ ن لیگ جنوبی پنجاب اور بہاولپور صوبوں کے قیام کی حامی ہے اور اس حوالے سے پارٹی سطح پر مشاورت جاری ہے۔