میر رضا جوڈیشل کمیشن کی رپورٹ نہ ملی تو عدالت سے رجوع کریں گے: جبران ناصر

میر رضا قتل کیس کی تحقیقات کے لیے قائم عدالتی کمیشن کی رپورٹ کو ترجمان وزیراعلیٰ کے سابقہ اعلامیے کے باوجود سندھ کابینہ کے منگل کو ہونے والے اجلاس کے ایجنڈے میں شامل نہیں کیا گیا ہے۔ 28 جولائی کو پی ای سی ایچ ایس سے لاپتہ ہونے والے نوجوان میر رضا علی خان کی لاش گلستان جوہر سے ملی تھی، جس کی تحقیقات کے لیے عدالتی کمیشن 15 اکتوبر کو اپنی رپورٹ جمع کرا چکا ہے۔ کراچی میں میڈیا سے گفتگو کرتے ہوئے مقتول کے وکیل جبران ناصر نے کہا کہ پولیس کیس کو خودکشی قرار دینے کی کوشش کر رہی ہے جبکہ عدالتی کمیشن نے پولیس کے موقف کے برعکس الگ رائے دی ہے۔ انہوں نے مطالبہ کیا کہ حکومت معاملے کی شفاف تحقیقات کے لیے فوری طور پر JIT تشکیل دے اور کمیشن کی رپورٹ متاثرہ خاندان کو فراہم کی جائے، بصورتِ دیگر عدالت سے رجوع کیا جائے گا۔