مجھے انجیکشن سے ڈر لگتا ہے، لپ فلر نہیں کروائے: اداکارہ سبینہ فاروق

معروف پاکستانی اداکارہ سبینہ فاروق نے سوشل میڈیا پر اپنے ہونٹوں کے حوالے سے زیرِ گردش خبروں اور لپ فلر (Lip Filler) کروانے کی افواہوں پر کڑی تنقید کرنے والوں کو آڑے ہاتھوں لے لیا ہے۔

حال ہی میں اداکارہ نے اپنے سرکاری انسٹاگرام اکاؤنٹ پر ایک ویڈیو شیئر کی جس میں انہوں نے ناقدین کو واضح جواب دیتے ہوئے کہا کہ انہیں ایک انسٹاگرام اسٹوری پر بہت سے صارفین کے کمنٹس موصول ہوئے جن میں یہ دعویٰ کیا گیا کہ انہوں نے لپ فلرز کروائے ہیں۔ سبینہ فاروق نے دوٹوک الفاظ میں تردید کرتے ہوئے کہا، “اگر کوئی لپ فلر کروا رہا ہے تو اس میں کوئی غلط بات نہیں ہے، لیکن حقیقت یہ ہے کہ میں نے کوئی فلر نہیں کروایا کیونکہ مجھے انجیکشنز سے شدید ڈر لگتا ہے، یہاں تک کہ میں بیماری یا انفیکشن کی حالت میں بھی انجیکشن نہیں لگواتی۔”

اداکارہ کا مزید کہنا تھا کہ اگر انہیں انجیکشنز سے خوف نہ ہوتا تو وہ بھی اپنی پسند کی چند چیزیں کروا لیتیں۔ انہوں نے اس بات پر بھی زور دیا کہ ہر انسان کو اچھا اور خوبصورت نظر آنے کا حق حاصل ہے، اور اگر کوئی اپنی ظاہری شکل بہتر بنانے کے لیے کچھ کرواتا ہے تو اس میں کوئی برائی نہیں۔ واضح رہے کہ سبینہ فاروق اس سے قبل بھی اپنے ڈراموں اور مختلف تنازعات کے دوران سوشل میڈیا صارفین کی تنقید کا بے باکی سے جواب دے چکی ہیں۔