حملوں کا خطرہ، امریکا کا مشرق وسطیٰ میں اپنے شہریوں کیلئے سکیورٹی الرٹ

مشرقِ وسطیٰ میں بڑھتی ہوئی شدید جیو پولیٹیکل کشیدگی، ایران اور یمن کی حوثی ملیشیا کے متوقع جواب یا ممکنہ حملوں کے خدشات کے پیشِ نظر امریکا نے خطے میں موجود اپنے شہریوں کے لیے ہائی سیکیورٹی الرٹ جاری کر دیا ہے۔

عرب میڈیا کی رپورٹ کے مطابق اردن، عراق، یمن، لبنان اور شام سمیت مشرقِ وسطیٰ کے 12 ممالک میں قائم امریکی سفارت خانوں کی جانب سے یہ خصوصی سیکیورٹی الرٹس جاری کیے گئے ہیں۔ سیکیورٹی ایڈوائزری میں امریکی شہریوں کو خبردار کیا گیا ہے کہ ایران اور اس کی حامی عسکری تنظیمیں خطے میں موجود امریکی شہریوں، سفارتی تنصیبات اور امریکی مفادات کو نشانہ بنا سکتی ہیں۔

امریکی انتظامیہ نے اپنے شہریوں کو سخت ہدایت کی ہے کہ وہ مشرقِ وسطیٰ کے تمام کشیدہ علاقوں کا سفر کرنے سے مکمل طور پر گریز کریں۔ اس کے علاوہ الرٹ میں شہریوں پر زور دیا گیا ہے کہ وہ خطے میں پروازوں کی منسوخی، ممکنہ فضائی حدود کی بندش اور ہنگامی صورتِ حال سے متعلق سفارت خانوں کی جانب سے جاری کردہ تازہ ترین معلومات سے مسلسل باخبر رہیں۔