قطر کا جلد نئی علاقائی دفاعی شراکت داری کے اعلان کا فیصلہ

قطر نے مشرقِ وسطیٰ میں سیکیورٹی چیلنجز کا ٹاکرا کرنے کے لیے اپنے علاقائی اتحاد یوں اور شراکت داروں کے ساتھ مل کر ایک نئی دفاعی شراکت داری قائم کرنے کا فیصلہ کیا ہے، جس کا باضابطہ اعلان جلد کیا جائے گا۔

گلوبل سیکیورٹی فورم سے خطاب کرتے ہوئے قطر کے نائب وزیراعظم شیخ سعود بن عبدالرحمان آل ثانی نے بتایا کہ قطر نے حال ہی میں اپنی قومی دفاعی حکمتِ عملی اور صلاحیتوں کا تفصیلی جائزہ مکمل کیا ہے۔ اس جائزے کے نتیجے میں ایئر ڈیفنس، ڈرون حملوں کی پیشگی روک تھام، سائبر سیکیورٹی اور سمندری و آبی سلامتی (Maritime Security) کو ملک کی اولین دفاعی ترجیحات میں شامل کیا گیا ہے۔

قطری نائب وزیراعظم نے امریکا کے ساتھ تزویراتی و عسکری تعاون کا حوالہ دیتے ہوئے کہا کہ اس مضبوط شراکت داری نے خلیجی خطے کی مجموعی دفاعی صلاحیتوں اور خودمختاری کو مزید استحکام بخشا ہے۔ شیخ سعود نے انکشاف کیا کہ خطے کی جنگی اور کشیدہ صورتِ حال کے دوران مشترکہ عسکری مہارت اور کئی دہائیوں پر محیط جدید دفاعی سرمایہ کاری کی بدولت 90 فیصد سے زائد حملوں کو کامیابی سے ناکام بنایا گیا۔ انہوں نے اعادہ کیا کہ قطر خطے میں دیرپا امن، پائیدار استحکام اور ابھرتے ہوئے نئے سیکیورٹی خطرات سے نبرد آزما ہونے کے لیے علاقائی شراکت داروں کے ساتھ مل کر دفاعی تعاون کے نئے فریم ورک پر تیزی سے پیش رفت کر رہا ہے