پنجاب حکومت کا جاسوسی کے آلات پر پابندی عائد کرنے کا فیصلہ

حکومتِ پنجاب نے شہریوں کی پرائیویسی، ذاتی معلومات اور بنیادی انسانی حقوق کے تحفظ کے پیشِ نظر صوبے بھر میں جاسوسی کے آلات اور خفیہ الیکٹرانک ڈیوائسز پر مکمل پابندی عائد کرنے کا بڑا فیصلہ کیا ہے۔

اس اہم اقدام کا بنیادی مقصد خفیہ نگرانی، بلیک میلنگ اور ہراسانی جیسے جرائم کی روک تھام کرنا ہے، بالخصوص خواتین اور بچوں کو خفیہ ریکارڈنگ اور نجی زندگی میں بلا اجازت مداخلت سے محفوظ بنانا ہے۔ حکومتی فیصلے کے مطابق خفیہ کیمروں، مائیکرو فونز اور ریکارڈنگ آلات سے لیس روزمرہ استعمال کی مختلف اشیاء—جن میں سمارٹ عینکیں، کیمرہ پین، ہڈن ڈیوائس گھڑیاں اور دیگر الیکٹرانک اشیاء شامل ہیں—کی غیر قانونی خرید و فروخت اور استعمال کے خلاف سخت قانونی کارروائی عمل میں لائی جائے گی۔

حکومتی ترجمان کے مطابق حالیہ دنوں میں خفیہ کیمروں کے ذریعے عام شہریوں اور بالخصوص خواتین کی بلا اجازت ویڈیوز بنانے اور بلیک میلنگ کی موصول ہونے والی متعدد شکایات کے تناظر میں یہ فیصلہ کیا گیا ہے۔ حکومت پنجاب نے واضح کیا ہے کہ شہریوں کی نجی زندگی اور بنیادی حقوق کی خلاف ورزی کسی صورت برداشت نہیں کی جائے گی اور ایسی ڈیوائسز کا برائے راست یا بالواسطہ غیر قانونی استعمال کرنے والوں کے خلاف انسدادِ ہراسانی اور متعلقہ قوانین کے تحت سخت سزائیں دی جائیں گی۔