حیدرآباد کا 38 سالہ شخص ریبیز کے باعث انتقال کرگیا

حیدرآباد سے تعلق رکھنے والا 38 سالہ شخص ریبیز (سگ گزیدگی) کے باعث کراچی کے جناح پوسٹ گریجویٹ میڈیکل سینٹر (JPMC) میں علاج کے دوران دم توڑ گیا۔

ہسپتال ذرائع کے مطابق متوفی، جس کی شناخت جاوید ولد قادر کے نام سے ہوئی، کو 18 اکتوبر کی رات تشویشناک حالت میں جناح ہسپتال کی ایمرجنسی میں منتقل کیا گیا تھا۔ مریض کو پانی سے شدید خوف (ہائیڈروفوبیا)، شدید چڑچڑاپن، تیز بخار اور کھانا پینا نگلنے میں انتہائی دشواری کا سامنا تھا۔ ڈاکٹرز کے مطابق مریض کو تقریباً 4 ماہ قبل چہرے پر آوارہ کتے نے کاٹا تھا، تاہم حملے کے بعد اسے ریبیز سے بچاؤ کی بنیادی ویکسین دی گئی تھی یا نہیں، اس حوالے سے حتمی تفصیلات معلوم نہیں ہو سکیں۔

جناح ہسپتال کے شعبہ نیورو میڈیسن کے ڈاکٹروں نے تفصیلی معائنے کے بعد مریض میں ریبیز انسیفلائٹس (Rabies Encephalitis) کی تصدیق کی۔ ہسپتال انتظامیہ کی جانب سے مریض کو ریبیز ویکسین کی ایک خوراک بھی دی گئی اور تمام ممکنہ طبی سہولیات فراہم کی گئیں، تاہم بیماری کے آخری مرحلے میں داخل ہو جانے کے باعث وہ جانبر نہ ہو سکا اور 19 اکتوبر کی سہ پہر 3 بجے انتقال کر گیا۔ اس المناک واقعے کے بعد طبی ماہرین نے عوام سے اپیل کی ہے کہ کسی بھی کتے یا جانور کے کاٹنے کی صورت میں زخم کو فوراً صابن اور پانی سے دھوئیں اور بغیر کسی تاخیر کے فوری طور پر مستند ہسپتال سے ریبیز کی مکمل ویکسین لگوائیں۔