فضل الرحمان سیاسی مقاصد کیلئے اداروں کو نشانہ بنا رہے ہیں: حنیف عباسی

وفاقی وزیرِ ریلوے حنیف عباسی نے جمعیۃ علمائے اسلام (ف) کے سربراہ مولانا فضل الرحمان کے حالیہ بیانات پر کڑی تنقید کرتے ہوئے کہا ہے کہ وہ اپنے سیاسی مقاصد اور اقتدار نہ ملنے کی خفگی میں قومی اداروں کو نشانہ بنا رہے ہیں، جو انتہائی قابلِ مذمت ہے۔

اسلام آباد میں میڈیا سے گفتگو کرتے ہوئے حنیف عباسی کا کہنا تھا کہ مولانا فضل الرحمان کی باتیں قوم اور شہداء کے اہل خانہ کے لیے شدید تکلیف اور اذیت کا باعث بن رہی ہیں، وہ ان عناصر کا ساتھ دے رہے ہیں جو دہشت گردوں کے حامی ہیں۔ وزیرِ ریلوے نے یاد دہانی کرائی کہ دہشت گردوں نے خود مولانا پر بھی ماضی میں حملے کیے، لیکن انہوں نے خیبرپختونخوا میں کسی شہید جوان کے جنازے میں شرکت تک نہیں کی۔

خیبرپختونخوا کی انتظامی صورتِ حال اور سیاسی منظر نامے پر بات کرتے ہوئے وفاقی وزیر نے کہا کہ صوبے میں بدامنی، بدعنوانی اور غیر قانونی ٹھیکوں کے خاتمے اور انتشار کی سیاست کے سدِباب کے لیے اقدامات کیے گئے ہیں۔ انہوں نے معدنیات سے متعلق معاہدوں کی افواہوں کو بے بنیاد قرار دیا اور واضح کیا کہ کسی کو بھی سیاسی مفاد کے لیے قومی سلامتی اور ملکی مفاد کی ‘ریڈ لائن’ عبور کرنے کی اجازت نہیں دی جائے گی۔ حنیف عباسی نے پاک فوج، پولیس اور سیکیورٹی اداروں کی قربانیوں کو خراجِ تحسین پیش کرتے ہوئے کہا کہ شہداء کی قربانیاں وطن کی بقا کی ضامن ہیں اور وزیراعظم شہباز شریف کی قیادت میں عالمی سطح پر ملک کا مثبت امیج اجاگر ہو رہا ہے۔