روسی وزیر داخلہ کی جی ایچ کیو آمد، فیلڈ مارشل سے ملاقات، سکیورٹی تعاون بڑھانے پر اتفاق

روسی فیڈریشن کے وزیرِ داخلہ ولادیمیر کولوکولتسیف نے جنرل ہیڈکوارٹرز (جی ایچ کیو) راولپنڈی کا دورہ کیا، جہاں انہوں نے چیف آف ڈیفنس فورسز فیلڈ مارشل سید عاصم منیر سے اہم ملاقات کی۔ پاک فوج کے شعبۂ تعلقات عامہ (آئی ایس پی آر) کے مطابق ملاقات میں باہمی دلچسپی کے امور، علاقائی سلامتی اور پاک روس سیکیورٹی تعاون کو مزید مستحکم کرنے پر تفصیلی تبادلہ خیال کیا گیا۔ اس موقع پر فیلڈ مارشل سید عاصم منیر نے روس کے ساتھ دیرینہ تعلقات کو فروغ دینے کے عزم کا اعادہ کیا، جبکہ روسی وزیرِ داخلہ نے خطے میں امن و استحکام کے لیے پاکستان کی کاوشوں اور دہشت گردی کے خلاف پاک افواج کی پیشہ ورانہ صلاحیتوں و قربانیوں کو سراہا۔ دونوں فریقین نے سیکیورٹی اداروں کے درمیان ادارہ جاتی روابط اور عملی تعاون کو مزید وسعت دینے پر اتفاق کیا۔