امریکا کو کیوبا کیساتھ ایندھن اور دیگر اشیاء کی تجارت محدود کرنے کا حق نہیں: برونو روڈریگز

کیوبا کے وزیر خارجہ برونو روڈریگز نے امریکا کی جانب سے عائد کردہ تجارتی پابندیوں اور بحری ناکہ بندی کو شدید تنقید کا نشانہ بناتے ہوئے کہا ہے کہ واشنگٹن کو یہ طے کرنے کا کوئی قانون یا اخلاقی اختیار حاصل نہیں کہ کون سے ممالک یا کمپنیاں کیوبا کے ساتھ تجارت کر سکتی ہیں۔ سوشل میڈیا پلیٹ فارم ایکس (X) پر جاری اپنے بیان میں کیوبن وزیر خارجہ نے واضح کیا کہ امریکی اقدامات کی حمایت کرنے والے دراصل کیوبا کے عوام کو اجتماعی سزا دینے کے عمل میں شریک ہیں۔ انہوں نے کھلے سمندر میں بحری جہازوں کو روکنے، توانائی کی ترسیل میں رکاوٹ ڈالنے اور دوسرے ممالک کی خودمختاری پر اثر انداز ہونے کی امریکی کوششوں کو مسترد کرتے ہوئے کہا کہ کیوبا کا موقف سچائی، بین الاقوامی قانون اور آزاد تجارت کے اصولوں پر مبنی ہے۔