بیرسٹر گوہر کا حکومت سے غیر مشروط مذاکرات کا مطالبہ

چیئرمین پی ٹی آئی بیرسٹر گوہر نے میڈیا سے گفتگو کرتے ہوئے کہا ہے کہ ان کی پارٹی مذاکرات سے بالکل انکار نہیں کر رہی، لیکن بات چیت ہر صورت “غیر مشروط” ہونی چاہیے۔ انہوں نے اس بات پر زور دیا کہ ملک، قوم اور جمہوریت کے بہتر مستقبل کے لیے مذاکرات کی کامیابی انتہائی ناگزیر ہے، جبکہ ملک میں گورنر راج یا ایمرجنسی لگانے کے اقدامات سے گریز کیا جانا چاہیے۔ بیرسٹر گوہر نے مطالبہ کیا کہ بانی پی ٹی آئی سے ملاقاتوں پر عائد پابندیاں ختم کی جائیں اور تمام گرفتار رہنماؤں کو رہا کیا جائے۔ حکومتی پیشکش پر تبصرہ کرتے ہوئے انہوں نے کہا کہ وزیراعظم کی جانب سے مذاکرات کو مشروط بنایا گیا ہے، جبکہ سیاسی لوگ ہمیشہ غیر مشروط طور پر بیٹھ کر مسائل کا حل تلاش کرتے ہیں۔ ان کا مزید کہنا تھا کہ اگر حکومتی رہنما پریس کانفرنسز کے بجائے سنجیدہ مذاکرات پر توجہ دیتے تو اب تک معاملات حل ہو چکے ہوتے، اور تمام مسائل کا واحد حل باہمی بات چیت میں ہی پوشیدہ ہے۔