شان ٹیٹ پاکستان کرکٹ ٹیم کے بولنگ کنسلٹنٹ، تفصیلات طے ہوگئیں

سابق آسٹریلوی فاسٹ بولر شان ٹیٹ کو قومی کرکٹ ٹیم کا فاسٹ بولنگ کنسلٹنٹ مقرر کرنے کا فیصلہ کیا گیا ہے، جس کے بعد وہ دوسری بار پاکستان کرکٹ بورڈ (پی سی بی) کے ساتھ اپنے پیشہ ورانہ سفر کا آغاز کریں گے۔ ذمہ دار ذرائع کے مطابق ٹیسٹ ٹیم کے بولنگ کوچ عمر گل کی سبکدوشی اور فیلڈنگ کوچ شین میکڈرمٹ کے مستعفی ہونے کے بعد پی سی بی نے شان ٹیٹ کے ساتھ معاہدے کی تمام تر تفصیلات کو حتمی شکل دے دی ہے۔

شان ٹیٹ اس سے قبل بھی پاکستان کرکٹ ٹیم کے بولنگ کوچ کے طور پر خدمات انجام دے چکے ہیں اور ان کی نئی تقرری کا باضابطہ اعلان جلد متوقع ہے۔ ذرائع کا کہنا ہے کہ وہ اپنی نئی ذمہ داریاں سنبھالنے کے لیے جلد پاکستان پہنچیں گے، جہاں وہ آئندہ اہم سیریز اور دوروں کے لیے قومی فاسٹ بولرز کی رہنمائی اور باؤلنگ شعبے کی بہتری کے لیے کام کریں گے۔