بانی پی ٹی آئی کے علاج پر لچک نہ دکھانا سمجھ سے بالاتر ہے: سلمان اکرم راجہ

پاکستان تحریک انصاف کے سینئر رہنما سلمان اکرم راجہ نے کہا ہے کہ ہمیں ذاتی معالجین کے مطالبے سے دستبردار ہونے کا کہا گیا ہے، جبکہ بانی پی ٹی آئی عمران خان  کے علاج کے معاملے پر کوئی لچک نہ دکھانا سمجھ سے بالاتر ہے۔ ایک ٹی وی پروگرام میں گفتگو کرتے ہوئے انہوں نے بتایا کہ بانی پی ٹی آئی سے وکلا اور فیملی کی ملاقاتیں نہیں ہو رہیں، تاہم انہیں یقین دہانی کرائی گئی ہے کہ منگل کے روز وکلا کی ملاقاتیں ہو سکیں گی۔ سلمان اکرم راجہ نے سہیل آفریدی کے حوالے سے گردش کرنے والی خبروں کو مسترد کرتے ہوئے کہا کہ ان کی کمیٹی مکمل بااختیار تھی، اور دہشت گردی کے خلاف متفقہ لائحہ عمل بنانے کی بات کی گئی تھی مگر اس مؤقف کو نہیں مانا گیا۔ انہوں نے خبردار کیا کہ اگر پنجاب سمیت دیگر اضلاع میں ایمرجنسی لگائی گئی تو حالات مزید ابتر ہو جائیں گے۔