ریاست خیرپور کے آخری حکمران میر علی مراد خان تالپور انتقال کر گئے

ریاست خیرپور کے آخری حکمران ہزہائی نس میر علی مراد خان تالپور دوم 93 برس کی عمر میں سکھر کے ایس آئی یو ٹی (SIUT) ہسپتال میں انتقال کر گئے۔ ان کے صاحبزادے پرنس میر مہدی رضا نے والد کے انتقال کی تصدیق کی ہے۔ سوگواران میں گہرے غم و الم کے ساتھ ضلعی انتظامیہ نے خیرپور بھر میں عام تعطیل کا اعلان کیا ہے، جبکہ ان کی نمازِ جنازہ کوٹ ڈیجی میں ادا کی جائے گی۔ ان کے انتقال کی خبر پھیلتے ہی تاریخی شہر کوٹ ڈیجی اور گردونواح میں فضا سوگوار ہو گئی۔

1933ء میں برطانیہ میں پیدا ہونے والے میر علی مراد خان تالپور ثانی، میر فیض محمد خان ثانی کے فرزند تھے اور انہوں نے ابتدائی تعلیم انگلینڈ ہی سے حاصل کی۔ وہ نہایت کم عمری میں ریاستِ خیرپور کے والی بنے، جہاں پاکستان کے پہلے وزیراعظم نوابزادہ لیاقت علی خان نے ان کی باقاعدہ دستار بندی کی تھی اور انہیں 17 توپوں کی سلامی کے ساتھ مکمل ریاستی اختیارات تفویض کیے گئے تھے۔ انہوں نے 1947ء سے 1954ء (ریاست کے پاکستان میں مکمل مدغم ہونے) تک بحیثیت والی خدمات انجام دیں۔ تالپور خاندان کی تاریخی عظمت کی یادگاریں جیسے قلعہ کوٹ ڈیجی، فیض محل اور مہرانو کا تاریخی جنگل آج بھی خطے میں موجود ہیں۔