خیبر پختونخوا کی صورتحال اور پی ٹی آئی کا لانگ مارچ، وزیراعظم کا صدر زرداری سے جلد دوبارہ ملاقات کا فیصلہ

اسلام آباد میں خیبر پختونخوا کی امن و امان کی نازک صورتحال اور پاکستان تحریک انصاف (پی ٹی آئی) کے متوقع لانگ مارچ کے پیشِ نظر وزیراعظم شہباز شریف نے صدرِ مملکت آصف علی زرداری سے جلد دوبارہ اہم ملاقات کا فیصلہ کیا ہے۔ ذرائع کا کہنا ہے کہ حکومت اور پی ٹی آئی کے درمیان مذاکرات کی ناکامی اور پیدا ہونے والے سیاسی چیلنجز کے بعد دونوں رہنماؤں کی اس ملاقات میں آئندہ کی سیاسی و آئینی حکمتِ عملی پر مفصل مشاورت کی جائے گی۔

ذرائع کے مطابق ملاقات کے دوران خیبر پختونخوا میں گورنر راج یا ایمرجنسی کے نفاذ سمیت مختلف آئینی و قانونی آپشنز پر غور کیا جائے گا، جبکہ صوبے میں امن و امان کی صورتحال سے متعلق اہم بریفنگ بھی دی جائے گی۔ وفاقی حکومت کی جانب سے ملک میں امن و امان قائم رکھنے کے لیے کیے جانے والے تدابیر کا جائزہ لیا جائے گا، تاہم گورنر راج یا ایمرجنسی سے متعلق حتمی فیصلہ وزیراعظم، صدر اور اتحادی رفقا باہمی مشاورت کے بعد ہی کریں گے۔