ایمان اور ہادی چٹھہ ضمانت کیس: ریکارڈ پیش نہ کرنے پر جج برہم

اسلام آباد کی انسدادِ دہشت گردی عدالت (ATC) میں ایمان مزاری اور ان کے شوہر ہادی علی چٹھہ کی درخواستِ ضمانت پر سماعت کے دوران کیس کا اصل ریکارڈ پیش نہ کرنے پر شدید برہمی کا اظہار کیا گیا۔ کیس کی سماعت انسدادِ دہشت گردی عدالت کے جج ابو الحسنات ذوالقرنین نے کی۔ تفتیشی افسر کے غیر حاضر ہونے پر فاضل جج نے ہتھکڑی منگوا لی اور سیکیورٹی انچارج سمیت ڈی ایس پی کو بھی فوری طلب کر لیا۔

سماعت کے دوران جب ڈی ایس پی نے انگریزی میں بات کرنے کی کوشش کی تو جج نے برہم ہوتے ہوئے کہا کہ ان کے ساتھ اردو میں بات کی جائے۔ ڈی ایس پی نے جب تفتیشی افسر کے گلگت بلتستان میں ہونے کا عذر پیش کیا اور واٹس ایپ کاپی کا پرنٹ عدالت میں دیا تو جج نے اسے مسترد کرتے ہوئے کاغذات واپس ڈی ایس پی کی طرف پھینک دیے اور اصل ریکارڈ پیش کرنے کا حکم دیا۔ جج ابو الحسنات ذوالقرنین نے سخت الفاظ میں تنبیہ کرتے ہوئے کہا کہ اگر عدالت کے احکامات پر فوری عمل درآمد نہ ہوا تو ایس پی اور ڈی ایس پی کو یونیفارم سمیت چھ ماہ کے لیے جیل بھیج دیا جائے گا۔ عدالت نے ڈی ایس پی کو کٹہرے میں ہی کھڑے رہنے کی ہدایت کی اور سیکیورٹی انچارج کو گیٹ بند کرنے اور اجازت کے بغیر کسی کو باہر جانے سے روکنے کا حکم دیا۔