مذاکرات ناکامی کی دو بنیادی وجوہات، اپوزیشن وفد بے اختیار تھا: طارق فضل چودھری

وفاقی وزیر طارق فضل چوہدری نے کہا ہے کہ حکومت اور اپوزیشن کے درمیان مذاکرات سے قوم کو راستہ نکلنے کی بڑی امیدیں تھیں، تاہم اپوزیشن نے انتشار اور گرما گرمی کے خاتمے کا ایک بہترین موقع ضائع کر دیا ہے۔ پارلیمنٹ ہاؤس میں میڈیا سے گفتگو کرتے ہوئے وفاقی وزیر نے دعویٰ کیا کہ مذاکرات کی ناکامی کی بنیادی وجہ اپوزیشن کے وفد کا مکمل طور پر بے اختیار ہونا تھا، کیونکہ تمام اختیارات خیبرپختونخوا حکومت کے پاس مرکوز تھے۔

طارق فضل چوہدری نے واضح اور سخت موقف اپنایا کہ اپوزیشن کے لانگ مارچ کو کسی صورت اسلام آباد میں داخل نہیں ہونے دیا جائے گا اور یہ مارچ اٹک سے آگے آتا ہوا دکھائی نہیں دے گا۔ انہوں نے مزید کہا کہ اپوزیشن دہشت گردی کی مذمت تک کرنے کے لیے تیار نہیں اور ان کی تمام تر توجہ صرف بانی پی ٹی آئی سے ملاقات پر مرکوز ہے۔ سیکیورٹی اور سیاسی صورتحال پر بات کرتے ہوئے وفاقی وزیر نے انکشاف کیا کہ وفاقی حکومت خیبرپختونخوا میں ایمرجنسی کے نفاذ کے آپشن پر بھی سنجیدگی سے غور کر رہی ہے۔