لائیو سٹاک برآمدات بڑھانے کیلئے خصوصی فارم ہاؤسز قائم کرنے کی منظوری

وزیراعظم محمد شہباز شریف نے ملک میں لائیو اسٹاک شعبے کی برآمدات میں نمایاں اضافے کے لیے ایک اہم منصوبے کی منظوری دے دی ہے، جس کے تحت اعلیٰ نسل کے درآمد شدہ مویشیوں کی خصوصی فارم ہاؤسز میں نشوونما کر کے انہیں بیرونی ممالک برآمد کیا جائے گا۔ اسلام آباد میں لائیو اسٹاک شعبے کی اصلاحات سے متعلق اعلیٰ سطح کے جائزہ اجلاس کی صدارت کرتے ہوئے وزیراعظم نے مویشیوں کی برآمد کے لیے قائم کیے جانے والے ان خصوصی فارمز کے لیے جانوروں کی درآمد کو ڈیوٹی فری کرنے اور ٹریس ایبلٹی کے لیے جدید ‘ٹیگنگ سسٹم’ متعارف کرانے کی ہدایت کی۔ اس کے علاوہ انہوں نے لائیو اسٹاک کو کارپوریٹ بنیادوں پر استوار کرنے، نجی شعبے کے ماہرین کی خدمات حاصل کرنے اور ملک بھر میں قائم مذبح خانوں کی بین الاقوامی سرٹیفکیشن و تھرڈ پارٹی ویلیڈیشن یقینی بنانے کے احکامات بھی جاری کیے۔

اجلاس کو بریفنگ دیتے ہوئے بتایا گیا کہ پاکستان میں اس وقت تقریباً 24.5 کروڑ مویشی موجود ہیں جن کی مجموعی مالیت 5.5 کھرب روپے کے قریب ہے۔ یہ شعبہ قومی معیشت میں 14.97 فیصد جبکہ زرعی جی ڈی پی میں 63.6 فیصد کا بڑا حصہ رکھتا ہے اور اس سے تقریباً 80 لاکھ دیہی خاندان وابستہ ہیں۔ بریفنگ میں انکشاف کیا گیا کہ مالی سال 2025-26 میں پاکستان کی گوشت کی برآمدات 530 ملین ڈالر کے قریب رہیں، جن کا بڑا حصہ متحدہ عرب امارات، سعودی عرب، کویت اور قطر کو برآمد کیا گیا۔ وزیراعظم نے ہدایت کی کہ ملک سے منہ کھر کی بیماری کے خاتمے کے لیے 2 ہفتوں میں واضح لائحہ عمل پیش کیا جائے تاکہ 2028ء تک برآمدات کو مزید بڑھایا جا سکے۔