اقوام متحدہ کے سیکریٹری جنرل آج پاکستان پہنچیں گے، اہم ملاقاتیں شیڈول

اقوامِ متحدہ کے سیکریٹری جنرل انتونیو گوتریس اپنے اہم دورے پر آج پاکستان پہنچ رہے ہیں۔ دورے کے دوران وہ اسلام آباد میں اعلیٰ ترین سیاسی و حکومتی قیادت بشمول صدرِ مملکت آصف علی زرداری، وزیراعظم محمد شہباز شریف اور نائب وزیراعظم و وزیرِ خارجہ محمد اسحاق ڈار سے اہم ملاقاتیں کریں گے۔ سیکریٹری جنرل اپنے دورے میں نیشنل ڈیزاسٹر مینجمنٹ اتھارٹی (این ڈی ایم اے) کے ہیڈکوارٹر بھی جائیں گے جہاں وہ 2022ء کے تباہ کن سیلاب کے بعد آفات سے نمٹنے کی قومی تیاریوں اور اقدامات کا جائزہ لیں گے۔ اس کے علاوہ وہ اسلام آباد میں واقع ‘یو این ایم او جی آئی پی’ (UNMOGIP) کے ہیڈکوارٹر کا بھی دورہ کریں گے جو پاک بھارت سرحد پر اقوامِ متحدہ کے فوجی مبصرین کا مشن ہے۔

1949ء میں پرتگال کے دارالحکومت لزبن میں پیدا ہونے والے 77 سالہ انتونیو گوتریس اقوامِ متحدہ کے نویں سیکریٹری جنرل ہیں، جنہوں نے یکم جنوری 2017ء کو اس منصب کی ذمہ داریاں سنبھالیں۔ انجینئرنگ کی ڈگری کے حامل اور چار مختلف زبانوں پر عبور رکھنے والے انتونیو گوتریس 1995ء سے 2002ء تک پرتگال کے وزیراعظم رہے، جبکہ جون 2005ء سے دسمبر 2015ء تک اقوامِ متحدہ کے ہائی کمشنر برائے پناہ گزین (UNHCR) کے عہدے پر فائز رہے۔ وہ دو دہائیوں سے زائد عرصہ پرتگالی پارلیمنٹ کے رکن اور سوشلِسٹ انٹرنیشنل کے صدر کے طور پر بھی خدمات انجام دے چکے ہیں۔