کائنات امتیاز کا بین الاقوامی کرکٹ سے ریٹائرمنٹ کا اعلان

پاکستان کی تجربہ کار فاسٹ بولر کائنات امتیاز نے بین الاقوامی کرکٹ سے باقاعدہ ریٹائرمنٹ کا اعلان کر دیا ہے۔ پاکستان کرکٹ بورڈ (پی سی بی) کے مطابق کائنات امتیاز نے اپنے کیریئر کے دوران 19 ایک روزہ (ون ڈے) اور 21 ٹی ٹوئنٹی بین الاقوامی میچوں میں پاکستان کی نمائندگی کی۔ وہ 2010ء اور 2014ء کے ایشین گیمز میں گولڈ میڈل حاصل کرنے والی قومی ٹیم کا اہم حصہ رہ چکی ہیں۔ انہوں نے اپنا آخری ون ڈے جنوری 2023ء میں آسٹریلیا جبکہ آخری ٹی ٹوئنٹی اکتوبر 2022ء میں تھائی لینڈ کے خلاف کھیلا تھا۔

کرکٹ سے ریٹائرمنٹ کے بعد کائنات امتیاز نے پہلے ہی کمنٹری اور میچ آفیشل کے شعبوں میں پیش رفت شروع کر دی تھی اور حال ہی میں انہوں نے بطور ویمن میچ ریفری اپنے نئے کیریئر کا آغاز کیا ہے۔ یاد رہے کہ کائنات امتیاز کا تعلق ایک اسپورٹس فیملی سے ہے؛ ان کی والدہ سلیمہ امتیاز بھی کرکٹ امپائرنگ سے وابستہ ہیں جو آئی سی سی انٹرنیشنل ڈیولپمنٹ پینل میں شامل ہونے والی پاکستان کی پہلی خاتون امپائر بنی تھیں اور 9 ون ڈے اور 69 ٹی ٹوئنٹی میچوں میں امپائرنگ کے فرائض سرانجام دے چکی ہیں۔