واضح احکامات نہ ملنے پر ڈی آئی خان قافلہ واپس بلایا، تصادم نہیں چاہتے: علی امین گنڈاپور

خیبرپختونخوا کے سابق وزیراعلیٰ علی امین گنڈاپور نے میڈیا کے لیے جاری کردہ اپنے اہم بیان میں بتایا ہے کہ انہوں نے وزیراعلیٰ خیبرپختونخوا سہیل آفریدی کے لانگ مارچ میں شرکت کے لیے ڈیرہ اسماعیل خان (ڈی آئی خان) سے ہزاروں کارکنان اور گاڑیوں پر مشتمل سب سے بڑے قافلے کے ساتھ پیش قدمی کی۔ انہوں نے بتایا کہ یارک ٹول پلازہ کے مقام پر پولیس نے دفعہ 144 کے نفاذ کا حوالہ دیتے ہوئے قافلے کو آگے بڑھنے سے روک دیا۔ انتظامیہ اور وزیراعلیٰ سیکرٹریٹ سے رابطے کے باوجود آگے جانے کے واضح احکامات موصول نہ ہونے پر مقامی تنظیم اور کارکنان کی مشاورت سے قافلے کی ڈیرہ اسماعیل خان واپسی کا فیصلہ کیا گیا۔

علی امین گنڈاپور نے وضاحت کی کہ وہ کارکنان کی زندگیوں کو کسی صورت خطرے میں نہیں ڈالنا چاہتے اور واضح قیادت کے بغیر کسی بھی تصادم کا راستہ اختیار نہیں کریں گے۔ پارٹی قیادت اور وزیراعلیٰ کی ہدایات کے تحت پرامن رہنے کا فیصلہ کیا گیا ہے، تاہم قافلے تمام تر سفری اور لاجسٹک انتظامات کے ساتھ مکمل تیار ہیں اور صرف دو گھنٹے کے نوٹس پر صوابی یا اسلام آباد کا رخ کرنے کی صلاحیت رکھتے ہیں۔ انہوں نے کارکنان کا شکریہ ادا کرتے ہوئے کہا کہ اگر قیادت نے باضابطہ حکم دیا تو اپنے مقصد کے حصول کے لیے کسی بھی قربانی سے دریغ نہیں کیا جائے گا۔