پی ٹی آئی کے پاس لوگ نہیں، لانگ مارچ اٹک سے آگے نہیں جا سکتا: گورنر خیبرپختونخوا

گورنر خیبر پختونخوا فیصل کریم کنڈی نے پاکستان تحریک انصاف (پی ٹی آئی) کے لانگ مارچ پر سخت تنقید کرتے ہوئے واضح کیا ہے کہ مظاہرین کو اٹک پل سے آگے کسی صورت بڑھنے نہیں دیا جائے گا۔ ایک نجی ٹی وی چینل کو انٹرویو دیتے ہوئے گورنر کے پی نے دعویٰ کیا کہ پی ٹی آئی کے پاس عوام کا عوامی سمندر نہیں ہے اور پارٹی میں پنجاب میں داخل ہونے کی صلاحیت ہی نہیں ہے۔ ان کا کہنا تھا کہ کے پی اس وقت دہشت گردی کے شدید عذاب سے گزر رہا ہے، مگر صوبائی حکومت سیکیورٹی مسائل پر توجہ دینے کے بجائے وفاق اور اسلام آباد پر چڑھائی کرنے میں مصروف ہے۔

فیصل کریم کنڈی نے کے پی حکومت کی معاشی و انتظامی کارکردگی اور امن و امان کی پالیسیوں کو شدید تنقید کا نشانہ بناتے ہوئے کہا کہ صوبے کا بانی پی ٹی آئی اور ان کے قریبی ساتھیوں کی غلط پالیسیوں کے باعث ستیاناس ہو چکا ہے۔ انہوں نے خبردار کیا کہ وفاق پر چڑھائی کے دوران سیکیورٹی کے سنگین خدشات موجود ہیں۔ صوبے میں گورنر راج سے متعلق سوال پر انہوں نے وضاحت کی کہ گورنر راج ہمیشہ ایک آخری آپشن ہوتا ہے، بالکل اسی طرح جیسے سرجری آخری حل ہوتی ہے؛ تاہم اگر صدرِ مملکت اور وزیرِ اعظم نے آئینی فیصلہ کیا تو گورنر راج کا نفاذ فوراً عمل میں لایا جائے گا۔