سعودی اتحادی افواج کا آپریشن فجر الیمن، تعز میں 250 حوثی جنگجو ہلاک

سعودی عرب کی زیرِ قیادت ملٹری اتحاد اور یمنی سرکاری افواج کی جانب سے حوثی ملیشیا کے خلاف وسیع پیمانے پر شروع کیا گیا مشترکہ ملٹری آپریشن ‘فجر الیمن’ (Operation Fajr Al-Yemen) پوری قوت کے ساتھ جاری ہے۔ تازہ ترین اطلاعات کے مطابق تعز شہر کے محاذ پر اتحادی فورسز کی شدید کارروائیوں کے دوران حوثی ملیشیا کے 250 سے زائد جنگجو ہلاک اور متعدد شدید زخمی ہو گئے ہیں۔ اس کے علاوہ صعدہ شہر میں حوثیوں کے بیلسٹک میزائلوں کے ایک اہم ذخیرے جبکہ دارالحکومت صنعا میں بیلسٹک میزائل لانچر کو فضائی کارروائی میں مکمل طور پر تباہ کر دیا گیا ہے۔

سعودی اتحادی افواج کے ترجمان کے مطابق ان فوجی کارروائیوں کا بنیادی مقصد باب المندب کی بین الاقوامی تجارتی شاہراہ اور بحری آمدورفت کا تحفظ یقینی بنانا ہے۔ آپریشن کے دوران الحدیدہ گورنریٹ اور جنوبی بحیرہ احمر میں بھی کارروائیاں کرتے ہوئے حوثی ملیشیا کے متعدد اسلحہ ڈپو، ڈرون و کشتیوں کے گودام اور سمندری بارودی سرنگوں کو تباہ کر کے ممکنہ حملوں کی سازشوں کو ناکام بنا دیا گیا ہے۔ دوسری جانب حوثی ملیشیا نے دعویٰ کیا ہے کہ انہوں نے ان حملوں کے جواب میں سعودی عرب کے دارالحکومت ریاض کے بین الاقوامی ہوائی اڈے اور آرامکو کی آئل تنصیبات کو نشانہ بنایا ہے۔