امریکا ایران مذاکرات کیلئے پاکستان کا کردار قابل تحسین ہے: انتونیو گوتریس

اقوامِ متحدہ کے سیکرٹری جنرل انتونیو گوٹیرس نے اسلام آباد میں نائب وزیراعظم و وزیرِ خارجہ اسحاق ڈار کے ہمراہ مشترکہ پریس کانفرنس کرتے ہوئے امریکہ اور ایران کے درمیان کشیدگی کم کرنے اور مذاکرات کی راہ ہموار کرنے میں پاکستان کے کلیدی اور ثالثی کردار کی بھرپور تعریف کی ہے۔ سیکرٹری جنرل نے کہا کہ عالمی سطح پر شدید تنازعات کے باوجود پاکستان نے بین الاقوامی سفارت کاری میں غیر معمولی اعتبار قائم کیا ہے اور مشرقِ وسطیٰ کے بحران سمیت یوکرین جنگ کے حل کے لیے ایک اہم سہولت کار کے طور پر ابھرا ہے۔ انہوں نے افغان مہاجرین کی دہائیوں تک میزبانی پر پاکستانی عوام کی سخاوت اور استقامت کو سراہتے ہوئے کہا کہ اقوامِ متحدہ افغان شہریوں کی باوقار اور رضاکارانہ واپسی کے اصول کی مکمل حمایت کرتی ہے۔

دوسری جانب نائب وزیراعظم اسحاق ڈار نے عالمی تنازعات اور بحرانوں کے سفارتی حل کے لیے اقوامِ متحدہ کے مرکزی کردار پر زور دیا۔ انہوں نے افغان سرزمین سے پاکستان کے خلاف ہونے والی عسکریت پسندی پر تشویش کا اظہار کرتے ہوئے عالمی برادری سے تعاون کا مطالبات کیا۔ اسحاق ڈار نے مسئلہ کشمیر کو اقوامِ متحدہ کی سلامتی کونسل کی قراردادوں کے مطابق حل کرنے کی ضرورت پر زور دیا اور بھارت کی جانب سے سندھ طاس معاہدے کی یکطرفہ معطلی کو بین الاقوامی قوانین کی خلاف ورزی قرار دیتے ہوئے نئی دہلی پر زور دیا کہ وہ پانی کو عسکری و سیاسی ہتھیار کے طور پر استعمال کرنے سے باز رہے۔ پریس کانفرنس کے اختتام پر اقوامِ متحدہ کے سیکرٹری جنرل نے دفترِ خارجہ کے سبزہ زار میں ایک یادگاری پودا بھی لگایا۔