پاکستان سری لنکا ٹی20 اور سہ ملکی کرکٹ سیریز کیلئے ٹریفک پلان جاری

راولپنڈی ٹریفک پولیس نے پاکستان، سری لنکا ٹی ٹوئنٹی سیریز اور متوقع سہ ملکی کرکٹ سیریز کے حوالے سے شائقینِ کرکٹ اور شہریوں کے لیے جامع ٹریفک پلان جاری کر دیا ہے۔ سیریز کے سلسلے میں پہلا پریکٹس میچ کل، 6 اکتوبر کو راولپنڈی کرکٹ اسٹیڈیم میں کھیلا جائے گا۔ سیریز کی سیکیورٹی اور ٹریفک کی روانگی کو برقرار رکھنے کے لیے ٹریفک پولیس کے 315 سے زائد افسران اور اہلکار ڈیوٹی کے فرائض انجام دیں گے۔

ترجمان ٹریفک پولیس کے مطابق ٹیموں کی آمد و رفت کے دوران ٹریفک کو متبادل راستوں پر ڈائیورٹ کیا جائے گا، جبکہ میچز اور پریکٹس کے اوقات میں نائنتھ ایونیو چوک سے ڈبل روڈ تک اسٹیڈیم روڈ کو مکمل طور پر عام ٹریفک کے لیے بند رکھا جائے گا۔ اسلام آباد سے آنے والی گاڑیوں کو فیض آباد سے ایکسپریس وے کی جانب موڑ دیا جائے گا۔ علاوہ ازیں، میچ دیکھنے کے لیے آنے والے شائقین کی سہولت کے پیشِ نظر تین مختلف مقامات پر باقاعدہ پارکنگ زونز قائم کیے گئے ہیں تاکہ شہر میں ٹریفک کا نظام متاثر نہ ہو۔