وزیراعظم کی پی ٹی آئی کو لانگ مارچ ختم کرکے مذاکرات کرنے کی پیشکش

وزیراعظم محمد شہباز شریف نے اسلام آباد میں کشمیر چوک انڈرپاس کے سنگِ بنیاد کی تقریب سے خطاب کرتے ہوئے پاکستان تحریک انصاف (پی ٹی آئی) کو جاری لانگ مارچ اور دھرنے ختم کر کے بامقصد مذاکرات کی پیشکش کی ہے۔ وزیراعظم نے کہا کہ اتفاقِ رائے سے طے پایا تھا کہ پی ٹی آئی قیادت کے ساتھ مسائل کا حل نکالنے کے لیے سپیکر چیمبر میں بات چیت کی جائے، تاہم پی ٹی آئی کے وفد نے پہلے سے طے شدہ امور میں تبدیلیوں کا مطالبہ کر کے مذاکراتی عمل کو ناکام بنانے کی کوشش کی۔

شہباز شریف کا کہنا تھا کہ دھرنوں اور سیاسی احتجاج کا پہلا نشانہ ملکی معیشت بنتی ہے، جسے پچھلے ڈھائی سال کی انتھک محنت، ترسیلاتِ زر اور آئی ٹی ایکسپورٹس میں اضافے کی بدولت مشکل سے استحکام کی طرف گامزن کیا گیا ہے۔ انہوں نے واضح کیا کہ حکومت عوام کے جان و مال کے تحفظ کو ہر صورت یقینی بنائے گی اور قانون اپنا راستہ خود بنائے گا۔ انہوں نے پی ٹی آئی قیادت کو ہوش کے ناخن لینے کا مشورہ دیتے ہوئے کہا کہ اگر وہ احتجاج اور لانگ مارچ ختم کر دیں تو حکومت اب بھی ان کے ساتھ بیٹھ کر باہمی مسائل کے حل کے لیے تیار ہے