دورۂ پاکستان: سری لنکا ٹی ٹوئنٹی کرکٹ ٹیم کا پہلا دستہ اسلام آباد پہنچ گیا

سری لنکا مینز کرکٹ ٹیم کے دورۂ پاکستان کے سلسلے میں مہمان ٹیم کا 13 رکنی پہلا دستہ اسلام آباد پہنچ گیا ہے۔ اسلام آباد انٹرنیشنل ایئرپورٹ پر پہنچنے والے پہلے دستے میں ٹی ٹوئنٹی سکواڈ کے 8 کھلاڑی اور ٹیم آفیشلز شامل ہیں۔ پاکستان پہنچنے والے اہم کھلاڑیوں میں ٹی ٹوئنٹی ٹیم کے کپتان کوشال مینڈس، داسن شناکا، مہیش تھیکشانا، ایشان ملنگا، کمینڈو مینڈس، لاہیرو اڈارا، چمندو وکرمسنگھے اور ڈونیتھ ویلالاگے شامل ہیں۔

مہمان ٹیم کے ہیڈ کوچ، 2 کھلاڑی اور دیگر 2 آفیشلز کل اسلام آباد پہنچیں گے، جبکہ ٹی ٹوئنٹی سکواڈ کے بقیہ 5 ارکان منگل کے روز پاکستان پہنچ کر اسکواڈ کو جوائن کریں گے۔ پاکستان اور سری لنکا کے درمیان 3 ٹی ٹوئنٹی میچوں پر مشتمل سیریز کا پہلا مقابلہ جمعہ 9 اکتوبر کو کھیلا جائے گا۔ سیریز کے تمام ٹی ٹوئنٹی میچز 9 سے 13 اکتوبر تک راولپنڈی کرکٹ سٹیڈیم میں کھیلے جائیں گے۔