صومالیہ بحری قزاقوں کے حملے میں جاں بحق پاکستانیوں کی میتیں اور زخمی کراچی منتقل، تھرڈ انجینئر کی نمازِ جنازہ ادا

صومالیہ کے قریب بحری قزاقوں کے خونریز حملے میں جاں بحق ہونے والے پاکستانی شہداء کی میتیں اور زخمیوں کو کراچی پہنچا دیا گیا ہے۔ گورنر سندھ نے حکومتِ پاکستان کی نمائندگی کرتے ہوئے کراچی ایئرپورٹ پر میتوں کو وصول کیا، جہاں پاکستان پیپلز پارٹی، ایم کیو ایم پاکستان، جماعتِ اسلامی کے رہنماؤں، متاثرہ خاندانوں اور زندگی کے مختلف شعبوں سے تعلق رکھنے والے افراد کی بڑی تعداد موجود تھی، جو اپنے پیاروں کے جسدِ خاکی دیکھ کر شدتِ غم سے نڈھال نظر آئے۔

ایتھوپین ایئرلائن کی پرواز ET-694 کے ذریعے جاں بحق ہونے والے سیکنڈ آفیسر کاشف عمر، تھرڈ انجینئر محمود انصاری اور بوائلر آپریٹر رفیع اللہ خان کی میتیں اور زخمی یاسر خان، عقیل خان، عثمان غنی اور شمس امین کراچی پہنچے۔ بعد ازاں جاں بحق تھرڈ انجینئر محمود احمد انصاری کی نمازِ جنازہ فیڈرل بی ایریا بلاک 21 میں واقع جامع مسجد الغنی کے باہر ادا کر دی گئی، جس میں گورنر سندھ، امیر جماعتِ اسلامی کراچی منعم ظفر، ایم کیو ایم کے رہنماؤں اور اہل علاقہ کی بڑی تعداد نے شرکت کی۔