ڈبلیو سی ایل: پاکستان کے میچ نہ کھیلنے کے فیصلے کے بعد پاک بنگلا دیش میچ منسوخ

ورلڈ چیمپئن شپ آف لیجنڈز (WCL) میں پاکستان چیمپئنز کے شرکت نہ کرنے کے حتمی فیصلے کے بعد انتظامیہ نے پاکستان اور بنگلہ دیش کے درمیان شیڈول میچ کو باضابطہ طور پر منسوخ کرنے کا اعلان کر دیا ہے۔ پاکستان کرکٹ بورڈ (پی سی بی) کی جانب سے ایونٹ کے لیے عدم اعتراض کا سرٹیفکیٹ (NOC) جاری نہ کیے جانے کے باعث قومی کھلاڑیوں نے میدان میں نہ اترنے کی پالیسی اپنائی، جس کے نتیجے میں منتظمین کو یہ میچ منسوخ کرنا پڑا۔

ذرائع کے مطابق پی سی بی نے گزشتہ سیزن میں بھارتی ٹیم کی جانب سے پاکستان کے خلاف کھیلنے سے انکار پر اپنے پالیسی موقف پر قائم رہتے ہوئے رواں سیزن تھری کے لیے بھی کھلاڑیوں کو این او سی جاری کرنے سے روک دیا۔ این او سی نہ ملنے کے باعث دبئی میں موجود پاکستانی کھلاڑیوں نے ایونٹ کا حصہ بننے سے معذرت کر لی، جس کے بعد ایونٹ انتظامیہ کو پاک بنگلہ دیش ٹکراؤ منسوخ کرنا پڑا۔